SUFFRAGIA ANTE TEMPUS CONSTITUTUM IN UCRAINA

Ubi duo certant, tertius vincere potest

Praesidens Ucrainae Victor Iustsenko dissoluit parlamentum terrae ac nova suffragia parlamentaria mox habenda pronuntiavit. Quod consilium effectum sit collapsus regiminis ministrae primariae Iuliae Tymosenko, quae principalis aemula Iustsenkonis facta est.

Ut dicunt analytici rerum Ucrainensium, vera causa dissolutionis erat voluntas dominae Tymosenko novam legem parlamento proponere ad adoptandum, qua potestas praesidentis minor fieret. In sermone, quo Iustsenko explanavit dissolutionem parlamenti, sunt etiam verba de "nimia cupiditate potestatis" ministrae primariae.

Utcumque res se habeant, una res videtur certa: Tymosenko aemulus Iustsenkonis erit tempore electionis praesidentis terrae anno 2010 habendae. Alter prinicpalis aemulus ad praesidentatum tunc verisimiliter erit Victor Ianukovyts, nunc praeses pro-Russicae Factionis Regionum, quae pars politica etiam victrix evadere potest suffragiorum parlamentariorum modo annuntiatorum.

Ambae aliae partes principales, ducibus Iustsenko et Tymosenko, officialiter cursum ad Occidentem terrae adiuvant; indagationes tamen opinionum monstrant circiter dimidiam partem civium Ucrainae favere artioribus iunctionibus cum Russia.

Scripsit Stanislaus Tekieli