ANIMUS BASSUS REGNAT IN WALL STREET ALIISQUE FORIS MUNDANIS

Consiliis reiectis tituli cadunt

Postquam die Lunae a Congressu USA reiecta essent consilia regiminis 700 miliardis dolariorum pecuniae publicae bancas aegrotantes adiuvare, omnia fora bursaria mundi haud exigue ceciderunt. Imprimis ipsae US-Americanorum bursae Wallstreetianae, quorum titiuli in summa media 7% viliores hoc die facti sunt, at tituli societatum technologicarum (quorum valor indice Nasdaq monstratur) etiam 9% perdiderunt.

Non vero multo melius res die sequente, Martis scilicet, se habent, nam 2,5-3,5% in summa media ceciderunt fora Asiae Orientalis et Australiae (ut Tokio, Hongkong, Sydney). Casu 3% coepit hodierna mercatura Londini, dum index DAX fori Francofurtensis 1,4% in sessionis apertura cecidit. Propter casus nimios negotiationes in foro Moscoviensi etiam suspendi debuerunt.

Praeter consilia regiminis USA a parlamento reiecta ferales pecuniae collocatoribus videbantur nuntii die Lunae allati de partiali publicatione argentariae Belgico-Batavicae Fortis, Britannicae Bradford & Bingley necnon de emptione pretio vilissimo sextae maximae in USA bancae Wachovia a sui aemulo Citigroup.

Scripsit Stanislaus Tekieli