De turbine Ike

"Numquam Cubae duo furacani adeo proximi memorantur" dixit sollicite Josephus Rubiera, qui Institutum Nationalem Furacanis addictum ducit. Nam simul ac turbo Gustav regiones ad occasum vergentes populatus est, nova procella Ike appellata iter ad Cubae oras orientales facit: iam tecta domorum abripuit, arbores avulsit, agros coffea et saccharo cultos vastavit. Lunae die provident caeli studiosi turbinem insulam percursurum et postridie Havanam, in maximam urbem, perventurum esse. Iam auctoritatis iussu urbs a vicies centenis milibus incolis et quindecim milibus periegetarum deserta est: nam pleraque aedificia parum idonea videntur talibus rebus adversis sustinendis. Etiam in Florida et in Ludoviciana incolae litorales derelinquendis domibus parati sunt.

Interea Haitiae centenae victimae numerantur post quattuor procellas, quae recentibus viginti diebus pauperrimam insulam percusserunt: minister primarius Michaël Petrus Louis adiumenta et helicoptera externa postulavit, propterea quod in regionibus et vicis lutulentis aquis a viis separatis plurimi auxilia frustra exspectant.

Scripsit Herimannus Novocomensis