Karadzic comprehensum esse

Radovanus Karadzic Bellogradi comprehensus est: qui barba capilloque promissis "Draganus Dabic" appellatus medicinam in valetudinario haud longinquo a Bellogrado exercebat: haec nuntiavit Vladimirus Vukcevic, magistratus Serbiae belli criminibus persequendis addictus, qui praeterea dixit neminem ex illius collegis nosse quis medicus ille esset peritus medicinae homoeopaticae. Magistratui interroganti reus respondere noluit, captivitatem suam "exodium" appellans; cuius patronus nuntiavit se provocaturum esse.

Radovanus Karadzic per decennium latitavit: nam ut dux politicus Bosniae Serborum contra ceteras gentes Jugoslaviae post annum MCMXCI saevissime bellavit ideoque ab iudicibus tribunalis Hagensis crimina belli persequentis absens cum Ratko Mladic armatorum duce damnatus est: ab illis eorumque copiis, ceteris neglectis, obsessum et expugnatum est Saraium, magna cum caede hominum, et septem milia virorum Srebrenicae, in oppido Bosniae, interfecta sunt.

Cives Saraii et Srebrenicae per fora viasque Radovanum Karadzic comprehensum celebraverunt.

Scripsit Herimannus Novocomensis