De crudeli credulitate

Undecim homines in Keniae provincia occidentali Kisii veneficii accusati a furenti multitudine concremati sunt: homicidae scelesti indicem artis magicae reorum confecerant, quos singulatim e domibus corripuerunt, deinde eorum aedes propinquis depulsis incenderunt. Quamquam saepe in regione illa mulieres veneficiorum incusatae occisae aut expulsae essent, antea numquam tot eodem die vexati fuerant. Custodum publicorum dux Antonius Kibunguchy diurnariis rettulit omnes victimas, octo mulieres et tres viros, amplius octoginta annos natas esse.

Incolae vicorum ubi haec facinora perpetrata sunt contra aggredientes non restiterunt, nam fere cuncti veneficiis fidem tribuunt: sunt qui diurnariis dixerint comprobatum esse victimas veneficas et veneficos esse seque libellum comperiisse ubi sagarum conventus describeretur et nomina legerentur illorum, in quos maleficia perficienda essent. Jovis die undeviginti viri caedis incusati in vincula coniecti sunt.

Scripsit Herimannus Novocomensis