De turbine quo Birmania vastata est

Regimen Birmanicum constituit suffragia de nova lege suprema die Saturni habenda esse, neglecta magna nationis perturbatione propter immanem turbinem ortam. Eodem die nuntiavit XXIII millia saltem incolarum profecto interiisse, ubi XXXVII millia sint ignotum esse. Procella enim Nargis appellata die tertio mensis Maii agros vicos urbes vel maximam urbem Rangoon vastavit, omnem populum defringens sed minime tyrannos qui iam diu cives Birmanicos oppresserunt: adiutores qui undelibet auxilia miseris afferre cupiunt vetiti sunt, ne fines superarent. Praesidens Ordinis Nationum Unitarum Ban Ki-moon severe rectores admonuit ut adiutorum gregibus accessus concederetur, sed singulae tantum USAe aëronavi Lunae die terram attingere licebit. XV centena milia Birmanicorum vehementi procella percussa esse existimantur.

Diurnarii retis televisifici Britannici BBC per delta fluminis Irrawaddy iter fecerunt atque horrifica narraverunt: catervatim cadavera hic illic dispersa, domos et casas tectis orbatas, arbores eradicatas humi iacere, dysenteriam inter superstites diffundi coepisse, auxilia minime calamitati adaequata esse. Institutum victus mundanum (World Food Programme) iam cibariorum magnam vim advexit sed distribuere nequit, quod rectores ipsi commeatus largitionem gubernare velint.

Interea cives Birmanici suffragia ferunt, exceptis regionibus turbine maxime afflictis: rectores ita comitia democratica post biennium habitum iri confirmant, oppositores contra hoc tantum tyrannorum propositum esse aiunt, ut ipsorum potestas magis magisque augeatur.

Scripsit Herimannus Novocomensis