Sinarum regimen cum Dalai Lama collocuturum esse

Regimen Pechinensis occidentalium pertinaciae cedens benevolentius se patefecit, ut perturbationes in Tibetia extenuentur propter quas Olympiades mense Augusto habendae obscuratae sunt. Sinarum moderatores proclamaverunt se paratos esse cum legatis Dalais Lamae conveniendo, quem iam diu accusaverunt quod machinatus esset tumultus qui mense Martio Lhasae, in Tibetiae capite, facti essent: quibus XX homines auctoritatum, CXL exsulum sententia vitam amisisse narrantur. Nuntiatum est conventum proximis diebus habendum esse, ut iterum atque iterum Dalai Lamae postulanti respondeatur, cuius officium sit - aiunt Pechini - talia dicere atque facere, ut consilium Sinarum rei publicae partiendae, incitamenta violentiae et conatus Olympiadum pessum dandarum desinant.

Qua re divulgata Dalais Lama per nuntium gratulatus est, quod colloquia tantum hominis cum homine Tibetiae quaestionem solvere possit. Et Unio Europaea, cuius praesidens Barroso Sinas nunc visitat, et Civitatum Americae Unitarum regimen se sperare sermones de Tibetia fieri nuper proclamaverant.

Scripsit Herimannus Novocomensis