De oryzae defectione

Multis Asiae nationibus subeundum est oryzae pretium increscens ut quam maxime: quod Ordo Escae et Agriculturae (FAO) nuntiavit septuaginta centesimis ultimo anno auctum esse, mensibus recentibus citius. Nonnullae nationes, cuius incolae plerumque oryza vesci soliti sunt, defectu pati coeperunt, verbi gratia Bengalia, Philippinae Insulae et Birmania.

Putant rerum oeconomicarum studiosi propter has rationes tanti pretia increvisse: quod noxia frugibus intemperies fuerit, quod aliquot nationum incolarum numerus ocius auctus sit, quod ab avidis mancipibus magna copia in horreis congesta sit, quod oryzae cultus in futurum defectum iri censeatur. Neque ceterae fruges sufficiunt, ut loco oryzae esurientibus suppeditentur.

Nam oryzae copiosissimi productores, sicut India, Sinae et Vietnamia, exportationes deminuerunt, ut commeatus in horreis servetur et pretii incrementum moderetur, quam ob rem maximi importatores sicut Bengalia, Philippinae Insulae et Afganistania inopia increscente patiuntur. Fruges tamen productae hoc anno vergente in Thailandiae et Vietnamiae novis culturis augescentur.

Scripsit Herimannus Novocomensis