De comitiis Zimbabviae

Die Saturni cives Zimbabviae suffragia ferunt, ut novum praesidentem deligant. Robert Mugabe ab anno MCMLXXX civitatem sine ulla intermissione rexit: qui colonos Britannicos ut patriae liberator expulit et fidem populi sibi comparavit. Cum illo Morgan Tsvangirai, partis MDC praesidentis strenuus adversarius, et Simba Makoni, olim minister rebus oeconomicis addictus, competunt, parva cum spe victoriae. Quorum priorem Mugabe Veneris die, postremum fautores suos allocutus, "pupulum Britannorum" appellavit.

Zimbabviae incolae recenter summum miseriae attigerunt: quotannis millies pretia increscunt, quintus quinque adultus regulariter operam dat: sed praesidens miseriae tantum nationes occidentales reas facit, quae contra regimen suum machinentur. Adversarii verentur, ut fraude voluntas Zimbabviae civium prodatur.

Scripsit Herimannus Novocomensis