Annus
2 0 0 8


De caede non intermissa

De caede non intermissa

Bagdati iterum atque iterum insontes intereunt. Jovis die in nundinis (quae in imagine adposita aspiciuntur) Bagdati insulae Karada appellatae, a Shiitis inhabitatae, duo pyrobola a scelestis abdita dirupta sunt, altera apud creberrimam viam altera paulo post ad reiectorum receptaculum: quod agentura Associated Press rettulit. LIV homines perierunt, CXXX vulneribus affecti sunt, plerumque adulescentes et iuvenes: sunt qui narrant membra disiecta ab adiutoribus ablata esse.

Hassan Abdullah, vir XXV annos natus indumentorum tabernae dominus, "Diruptionem priorem - inquit - CL metrorum intermisso spatio audivi eoque auxilium laturus me contuli, cum repente altera diruptio facta est: crus et manus dum ingredior humum deciderunt. Usquequaque omnia perturbari, saucii subsidium poscere, populus aufugere."

Numerum victimarum, qui a mense Augusto continenter conciderat, mense Februario augescere confirmant auctoritates, quod Sunnitarum militiae se congregare coeperint et Shitarum copiae a Moqtada al-Sadr ductae facinora sua moderaverint.

Scripsit Herimannus Novocomensis



Retro ad:

Novissima editio
Summum paginae