ADIMETNE CANDIDATUS TERTIAE PARTIS VOTA DEMOCRATIS?

Nader in comitiis praesidentialibus certaturus

Ralph Nader, homo actuosus sinistrae partis US-Americae et ductor motus consumatorum, declaravit die Solis se certaturum esse in huius anni comitiis praesidenti USA eligendo.

Qui vir politicus independens, non favet enim republicanis neque democratis, iam bis praesidens Civitatum Unitatum fieri conatus est. Anno 2000 ut candidatus motus prasinorum collegit vota 2,7% Americanorum, quo effectu verisimiliter victoria privavit candidatum democratarum, Al Gore, qui minima tantum parte suffragiorum pugnam amisit contra republicanum hodiernum praesidentem George W.Bush. Maxima enim pars civium Nader vota dantium creditur aliter candidato democratarum favisse.

In comitiis anni 2004 Nader allexit tantum 0,5% suffragiorum.

Nunc a democratis timetur, ne impediturus sit Nader victoriae senatoris Barack Obama, qui verisimiliter candidatus officialis fiet huius factionis, domina Hillary Clinton in praeelectionibus non bene succedente. Nader tamen dixit in programmate televisionis NBC maiorem partem Americanorum delusos se sentire ab ambabus magnis factionibus.

"Si democratae dubitant se hoc anno non clare victuros, cur omnino certant?" - rogavit Nader, qui eodem in programmate Wasintoniam nuncupavit "terram occupatam a corporationibus (commercialibus), quae regimen urgent, ut contra bonitatem civium consilia capiat".

Scripsit Stanislaus Tekieli