|
|
|
SOCIALIA
Vultuumliber 11111111
 Liber
Vultuum
Marcus Zuckerberg celebrat diem, quo utentes celeberrimi retis socialis quinquies millies centena milia fiunt.
Cito nuntiabitur Librum Vultuum, rete sociale popularissimum,
numerum quinquies millies centenorum milium (Arabicis symbolis: 500.000.000)
sociorum attigisse. Quod non multum videri possit, si consideres
terricolas fere septuaginties millies centena milia esse (7.000.000.000);
attamen cotidie inscriptio interretialis www.facebook.com locum inter
frequentissimas sibi comparavit, quod mercium vulgatorum multum
interest.
In reti sociali utens non more solito nuntiis fruitur, sed
particeps est, communicat, sodalicii socius fit "duo punctum
nihil" (2.0) appellati, cuius subiecta - scripta
cogitationes experientiae cinemata musica consilia -
longinquitate non separantur, sed in cursus congregantur unde
suum quisque rerum fluxum alit. Hic mundus digitalis adauctus cum
rmundo completur eiusque novos aspectus, novas facultates sine
intermissione demonstrat. Gugulum (Google) alterum retis
ens est de millies centenis milibus utentibus cogitans, iam in
reti sociali "Me Gugula" elaborans.
Pone magnum virum, magna mulier esse solita est: Miranda
Zuckerberg Marci soror imagini publicae Libri Vultuum consulit
eumque cum fratre regit. Mirandae consilium est numerum utentibus
ipsis adiuvantibus celebrandi; nam ab initio Libri Vultuum
principes accurate omnia quae ibi fiunt observaverunt, historias
utentium, res de quibus acriter disputatum est, parvas cotidianas
commutationes quarum ipsa terrae totius tela (World Wide Web)
causa fuit colligentes. Celebrationem ergo ipsi utentes per se
perficient in "Historiis" (Stories), fere situ
in situ locato, quae res et acta maximi momenti (iuxta dominorum
sententiam) inter omnia recentia demonstrabunt.
"Historiae" secundum loca et res deligi poterunt, varia
enarrantes sicut homines repertos, naturae calamitates, amantium
casus, ut rete digitale in instrumentum sociale commutetur:
utenti facultas dabitur narrationem CCCCXX litteris longam
mittendi, si maluerint eam suae cuique imagini nectenti de se
narratiunculae instar. Liber Vultuum lepidissima eliget et in
apertionis pagina colliget; utentium est delectus inter
"placet" et "displicet".
Unde tamen Libri Vultuum tanta frequentia? sunt qui putent mox
popularitatem deminutum iri, quod dominos ad commutationem
aliquam impellent. Haec usque ad hunc dies causa videtur esse,
facile quemlibet cum quolibet colloqui et participem esse et in
maiores manipulos congregari posse. Unicuique hoc videtur, se
sine ulla difficultate ex humilitate totius orbis factis
participem esse, situ interretiali amplissimo mure tantum et
clavibus utentem.
Praeterea Liber Vultuum id, quod plerique de interreti censere
soliti essent, commutavit: telam mundanam non solum imaginibus
obscaenis, aëronavibus ex sideribus remotis venientibus,
coniuratis et chartularum creditoriarum furibus refertam esse.
Marcus intellexit se aliquid se ipso maius manibus tenere: ludum
socialem quo communicationes et sodalicia inexplorata exoriri
possent. Exempla praebent "Domus rustica" (Farmville)
et "Domus confinis" (Frontierville), ludi
sociales unde humanae amicitiae quae aliter fieri nequissent
gignuntur. Ex ordine vultuum, Liber Vultuum instrumentum factum
est quo novis rationibus mundo uti, mundum commutare possis. Tu
tibi factorum actor videris, ut utentium catervae cotidie
ostendunt.
Hoc
scriptum Titiani Toniutti in actis diurnis interretialibus
Italicis "La Repubblica" die XIX mensis Julii MMX
apparuit et in linguam Latinam conversum est.
Scripsit Herimannus Novocomensis - 21/07/2010 16h49
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
