|
|
|
SCIENTIAE
The Brain Is Not Modular:
 De cerebri structura
Scientiarum studiosi saepissime translationibus seu metaphoris
utuntur, ut notiones nimis arduae intellectu vel sensui communi
oppositae profanorum mentibus comprehensibiles fiant: nam mens
nostra simplicibus tantum rebus accipiendis apta est.
Ita atomi structura saeculo praeterito ineunte systemati
solari comparata est, cui minime re vera similis est. Cerebri
functio saeculo duodevicesimo machinae hydraulicae, undevicesimo
apparatui computatorio, vicesimo computatro electronico, nunc
cultro Helvetico comparata est, ubi plures facultates insunt
verbi gratia videndi eloquendi recognoscendi investigandi
periclitandi de spiritu denique ac Deo cogitandi.
Translatio cultri Helvetici, aliter vocata exemplaris
structura (modularity), recenti ratione cerebrum
conspiciendi oritur, cui nomen est "functionum effictio
resonitu magnetico confecta" (functional magnetic
resonance imaging): quotienscumque cerebrum de aliqua re
cogitavit, regio quaedam splendore plerumque in monitorio
rubescente refulget. Sed hac ratione cerebri observandi non est
abutendum: sunt enim qui singulas partes encephali designaverint
ubi cogitatio de Deo aut de partibus politicis gratis aut
adversis resideat. Cerebri enim unaquaeque regio plurimos status
cognovit, quam ob rem sua unicuique regioni res descriptionis
geographicae more attribui non potest. Si quis exempli gratia
timore captus est, refulget neuron qui amygdala appellantur;
amygdalae tamen splendor timoris certum indicium non est.
Scriptum hoc ex articulo "The Brain Is Not
Modular: What fMRI Really Tells Us" auctoris
Michael Shermer in actis interretialibus "Sciam.com"
excerptum et conversum est.
Scripsit Herimannus Novocomensis - 15/05/2008 07h57
.
.
|
|
BREVES
Turcia. Relatores Turci XXII annorum poena damnati ob involucrum diurnarii, quod "ad seditionem excitavit". - 22/05/2017 23h42
Inter 160 et 200 bellatores Curdici mortui sunt die Iovis ob ictus aeroplanorum Turcicorum in boreali parte Syriae – nuntiaverunt duces exercitus Turcici. Bellatores autem Curdici maximi socii sunt US-Americanorum contra Califatum Islamicum pugnantium. - 20/10/2016 13h34
Shimon Peres, princeps Israelianus, qui anno MCMXCIV Praemio Nobeliano pro pace exornatus fuit, agens nonagesimum quartum annum aetatis obiit. - 03/10/2016 18h31
VIDE ETIAM
|
