III. Anno autem quinto decimo imperii Tiberii Caesaris, Iudaeae praeside Pontio Pilato, quarti autem principe Galilaeae Herode, Philippo autem fratre eius quarti-principe Ituraeae et Trachonitidis regionis, et Lysania Abilinae quarti-principe,

² sub pontifice Anna et Caiapha, factum est uerbum Dei super Ioannem Zachariae filium in deserto.

³ Venit in omnem regionem circa Iordanem praedicans immersionem conuersionis in remissionem peccatorum,

⁴ sicuti scriptum est in libro uerborum Isaiae uatis: ‘Vox clamantis in deserto: Parate uiam Domini, rectas facitote semitas eius.

⁵ Omnis uallis implebitur, et omnis mons et collis humiliabitur; et praua erunt directa, et aspera uiae planae:

⁶ et uidebit omnis caro salutem Dei’.

⁷ Dicebat igitur ad turbas, quae exibant, ut immergerentur ab illo: ‘Genimina uiperarum, quis ostendit uobis, ut fugeretis ab ira uentura?

⁸ Ergo facite fructus dignos conuersionis neque coeperitis dicere in uobismet: ‹Patrem habemus Abraham›. Dico enim uobis Deum posse ex his lapidibus suscitare Abrahae filios.

⁹ Iam enim et securis ad radicem arborum posita est; ergo omnis arbor non faciens fructum bonum exciditur et in ignem iacitur’.

¹⁰ Interrogabant eum turbae dicentes: ‘Quid ergo faciamus?’.

¹¹ Respondens autem dicebat illis: ‘Qui habet duas tunicas, is det non habenti; et qui habet escas, similiter faciat’.

¹² Venerunt autem etiam publicani, ut immergerentur, et dixerunt ad eum: ‘Magister, quid faciamus?’.

¹³ Qui dixit ad illos: ‘Nihil facitote amplius quam constitutum est uobis’.

¹⁴ Interrogabant autem eum etiam milites dicentes: ‘Quid faciamus et nos?’. Dixit illis: ‘Neminem concutiatis neu calumniam faciatis, et contenti estote stipendiis uestris’.

¹⁵ Existimante autem populo et cogitantibus omnibus in cordibus suis de Ioanne, num forte ille esset Christus,

¹⁶ respondit Ioannes dicens omnibus: ‘Ego quidem in aqua immergo uos. Venit autem fortior me, cuius non sum dignus, qui soluam corrigiam calceamentorum. Ille uos immerget in Spiritu Sancto et igne.

¹⁷ Cuius uentilabrum in manu eius ad purgandam aream suam et ad congregandum triticum in horreum suum; paleas autem comburet igne inexstinguibili’.

¹⁸ Multa quidem et alia exhortans fauste nuntiababat populo.

¹⁹ Herodes autem quarti princeps, cum corriperetur ab illo de Herodiade uxore fratris sui et de omnibus malis, quae fecit Herodes,

²⁰ adiecit et hoc supra omnia: inclusit Ioannem in carcere.

²¹ Factum est autem, cum immergeretur omnis populus, et Iesu baptizato et orante, ut aperiretur caelum,

²² et descenderet Spiritus Sanctus corporali specie sicut columba super eum; et uox de caelo fieret: ‘Tu es Filius meus dilectus; in te mihi complacui’.

²³ Ipse Iesus erat incipiens annum fere trigesimum, cum esset – ut putabatur – filius Iosephi [qui fuerat filius] Helis,

²⁴ Matthatis [qui fuerat filius] Leuitis [qui fuerat] Melchitis Iannae Iosephi

²⁵ Matthathiae Amosis Nahumi Esli Naggae

²⁶ Maathis Matthathiae Semei Iosechis Iodae

²⁷ Ioananis Resae qui fuit Zorobabelis Salathielis Nerii

²⁸ Melchii Addii qui fuerat Cosamis Elmadamis Heris

²⁹ Iesu Eliezeris Iorimi Matthatis Leuitis

³⁰ Simeonis Iudae Iosephi Ionae Eliachimis

³¹ Meleae Mennae Matthathae Nathanis Dauidis

³² Iesse Obedis Boozis Salmonis Naassonis

³³ Aminadabis Adminis Arnii Esromis Pharesis Iudae

³⁴ Iacobi Isaaci Abrahae Tharis Nachoris

³⁵ Seruchi Ragaui Phalegi Heberi Salae

³⁶ Cainani Arphaxadis Semis Nois Lamechi

³⁷ Mathusalae Henochi Iaredi Malaleeli Cainani

³⁸ Enosi Sethis Adami, Dei.

Scripsit fr.Benedictus Huculak OFM - 19/10/2018

---