|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
PERIEGETICA
Amstelodamum (pars altera)Ne quis putet Amstelodamum quiete et artibus tamtum vivere!
Aggeris forum (Dam), ampla platea in media urbe, scaena
est varia et continenter mutabilis: domus regia imminet, prae
quam histriones mortis vel hominis capite obtruncati partes agunt
periegetas exterrentes, contra procera columna (quam in
imagine adposita aspicis, quam filiolus meus Andreas impressit)
bellorum victimas commemorat; post quam insula voluptatum
incipit, ubi licent meretricium et libido. Neque illi, cui aliquandiu in urbe manere liceat, neglegendae sunt insulae suburbanae, monumentis magnis carentes sed vita pulsantes, sicut Jordaan et De Pijp: cauponam quamvis initurus, nescis unde terrarum oriundus sit vir aut mulier pone tabulam, pro certo tamen habeas te cum ipso de nugis Anglico sermone diu colloqui posse. Scripsit Herimannus Novocomensis
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
Aggeris forum
non solum sub sole, sed etiam sub stellis plurimis indigenis et
visitatoribus abundat manducantibus colloquentibus spectantibus,
tramina interea lucenter silenter sine intermissione transeunt.
Si inde stationem ferriviariam versus iter feceris, varietatem
hominum et cauponarum admiraberis qua pluriloquum pluricolor
pluriversum singulariter Amstelodamum excellit. Apud stationem
ipsam visere poteris (si tibi placeat) "Amoris musaeum"
(Sex Museum), ubi historiam et singularia de arte
amatoria eiusque imaginibus trium tantum euronum pretio aspicere
possis.
