|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
OECONOMIA
Ubi pecuniam collocare? - rogitant negotiatores in toto orbe terrarum perterriti crisi creditoria FORTASSE IN BRASILIA - suadet Jon Markman, scribens pro MSN News. Cuius argumenta sunt talia: Brasiliam esse maximam omnium terrarum Americae Meridionalis, habere permagna viscera sive bona terrae (et metalla et frumenta), producere crescentem copiam alimentorum ignis - a multis speratur illa mox fieri exportatrix combustibilium, novis venis petrolei in oris Atlantici repertis necnon cito crescente fabricatura benzini e cana saccharea. Porro, laborat haec terra relative minori (pro terris modo maturatis) corruptela. Iam nunc - docet Markman - a tribus praeteritis annis Brasiliam maximi momenti esse pretiis in foris mundanis statuendis talium mercium ut chalybs, ferrum, aurum, frumentum necnon viscera energetica. Ob prognosin eam exportatricem energiae mox fieri - cum multi alii exportatores se mox importare alimenta ignis debere timent - crescit numerus pecuniae peregrinae, quam alliciunt tituli societatum Brasiliensium, ut imprimis negotiationes petroleariae Vale et Petroleo Brasileiro, fundatio collocatoria Brasil iShares, argentariae Bradesco et Banco Itau Holding Financeira, fabricatrices chalybis Companhia Siderurgica Nacional et Gerdau ac societas papyrum fabricans Aracruz Celulose. Qua re effectum etiam est, ut bursa titulorum Bovespa multo melius aliis foris argentariis mundi se proximis praeteritis annis habebatur - crescens 535 centesimis ab anno 2003, noviens ergo tantum quam index Neoeboracensis S&P 500. Neque finem huius incrementum analytici adhuc conspiciunt, cum desiderium globale materiae combustibilis atque ciborum minime decreturum aestimetur. Contra primas opiniones timoresque negotiatorum, politica e laeva parte oriundi praesidentis Luiz Inacio Lula da Silva, qui hoc munere fungitur ab anno 2003 (uno anno postquam Brasilia 40 mld USD in aere alieno ab Internationali Fundatione Monetaria propter crisin fiscalem ducere debuerat), oecnonomiae non noceet, immo prosit. Qui fautor reformationis socialis hominem omnino 'pragmaticum' se esse praebuit, ubi ad res oeconomicas spectetur. Praeterito mense Aprilis agentura aestimatoria Standard & Poor's assignavit Brasiliae optimam notam, qua tantum "oeconomiae vero maturae" donari soleant. Similiae nota expectantur nunc ab aliis agenturis - Moody's et Fitch. Fortasse ergo erravit ille dux Francogallus generalis Charles de Gaulle, sententiam pronuntians Brasiliam esse terram maxima cum spe rerum futurarum et talem semper mansuram - meditatur Markman. Scripsit Stanislaus Tekieli - - 21/05/2008 11h21
. .
|
BREVES
SCIENTIAE
SOCIALIA
RELIGIO
SOCIALIA
RELIGIO
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
