ULTIMUM DUELLUM

USA UK 2021

Dispositor spectaculi Ridley Scott. Histriones maximi momenti: Matt Damon; Adam Driver;Jodie Comer; Ben Affleck; Alex Lawther.

ULTIMUM DUELLUM (Last Duel)

Hoc magnificum opus cinematographicum a narratione historica scriptoris Erici Jager sumptum est, qui tractat de ultimo atrocique certamine equestri anno MCCCLXXXVI sustento a duobus armigeris coram nobilitate et populo. Res agitur saeculo XIV exeunte Bello Centum Annorum. Scaena initii praenuntiat quod futurum est; deinde fabula filmica enarrat quod antea acciderat ab anno MCCCLXX. Omnes vices, quod insolitum exstat, narrantur a tribus personis magni momenti, ex eorum sententiis et opinionibus. Iohannes primus explanat. Interiectae scaenae memorativae incipiunt a pugna apud Augustoritum cui intersunt duo armigeri amicitia iuncti, Normannus Iohannes De Courreges (Matt Damon) et humili genere natus sed doctus, Iacobus Le Gris (Adam Driver). Postea consuetudo cessat cum Iacobus, curator comitis Petri (Ben Affleck) consobrini regis Francogalliae Caroli VI, (Alex Lawther) coegerit patrem sponsae Iohannis ut vectigalia penderet praedio in dotem puellae promisso. Post matrimonium rem iniquam aegre ferens Iohannes petit a comite Petro ut possessio reddatur, sed frustra. Immo praedium optatum Iacobo muneri conceditur, et graviore iniuria adiuncta, munus ducis mercenariorum, quod hereditate Iohanni accipiendum erat ipsi Iacobo tribuitur. Interea pulcherrima uxor Margarita (Jodie Comer) post aliquos annos nondum filios genuerat. Post expeditionem in Scotiam, Iohannes, magna virtute in bello praebita, dignitatem equestrem consequitur, sed domi mulier ei confitetur se stupratam esse cum in castello nemo fuerit, profecta socru cum servis. Deinde ille, ira furens, ad singulare certamen costituit provocare Iacobum ut decus suum et uxoris reparet. Id reputatur iudicium Dei: nam qui victor discesserit se verum dixisse ostendet, victus se mendacem demonstrabit. Sed quod gravissimum est, incensa moritura est femina quae stuprum declaravit, quasi falsum diceret.

Deinde res ex Iacobi sententia narrantur. Die festivo parato pro Iohanne equite nominato, duo adversarii pacem inter se componunt, sed Iacobus amore incenditur Margaritae, pulcherrimae Iohannis uxoris. Tanta est animi concitatio ut inveniat quomodo dolo in castello ineat ut feminam magna vi opprimat. Ille putat Margaritam amori respondere adeo ut ab ea petat ne quicquam marito patefiat.

Tertia opinio Margaritae praebitur. Illa voluit comiter se gerere cum Iacobo ut viro faveret, amicae autem confessa est eum formosa facie esse, sed infidum. Postea viro absente, nemo cum adsit, in castellum init fraude usus: ea omnibus viribus opponitur, ille insequitur et ea frustra resistente, stuprum conficit. Hoc firmat in iudicio, quamvis infandam poenam noverit, victo viro ab adversario. Interea Margarita gravida est sed ignorat quis sit nascituri pater, cum vir, post stuprum, eam ad copulationem coegerit. Rex audito testimonio decernit ut verum duello equestri inspiciatur. Ante duellum Margarita masculum parit.

Singulare certamen ante regem, nobiles, comitem Petrum et multitudinem magno apparatu efficitur. Culmen spectaculi duellum atrox, ferox, quod machina cinematographica circumagens effingit dum qui adsunt alterutri favent. Cum iam stat Iacobus prope victor et a tergo adversarium necaturus est Iohannes humi se convertens praeter exspectationem crus percutit cultro et alterum sternit, postea trucidat.

Loca, vestimenta, mores, arma, proelia spectatores in atrum tempus proiciunt a nostro remoto. Tamen violentia bis perpetrata feminis stupratis ad hanc aetatem simulque ad nostram spectat, cum in iudicio accusator in dubio vim ponat et victimam cogat ut verbis repetat quid ceciderit, quasi falsum adfirmaret et res inter se pugnantes.

Scripsit Lydia Ariminensis