NORMAN

De modico ascensu et tragico casu ardalionis Neoboracensis

Norman: The Moderate Rise and Tragic Fall of a New York Fixer USA 2016

Regimen spectaculi: Joseph Cedar; dispositor scaenarum: Joseph Cedar; histrio princeps: Richardus Gere; histriones maximi momenti:Lior Ashkenazi; Michael Sheen; Steve Buscemi; Charlotte Gainsbourg.

Norman Oppenheimer, humilis ardalio gregis Hebraeorum Neoboracensium, usus fraude facit ut virum politicum Israelianum nomine Micha Ashel conveniat, sed, cum inierint forte in sumptuosam tabernam, occursum maximo pretio solvit: Norman, ut sibi viri gratiam magni momenti conciliet, quamquam pauper, ei calceos plus quam mille dollariis constantes, donat. Interea pro eo, magno labore, falsis rebus iactatis, invitationem ad cenam hominis ditissimi dubiae famae praeparavit, sed Israelianus, oboediens homini dignitate superiori, in deversorio manet, cum timor sit ne in dicrimen veniat.

Post aliquot annos cum Ashel Minister Primarius Israelis creatus sit, operam maximam dat ut foedera cum Palaestinis faciat atque pacem in Medio Orienti afferat. Iterum duo viri Novi Eboraci inter se occurrunt et coram grege Hebraeroum Ashel ait Norman suum amicum esse quocum cumque eius nepote in photographia se ostendit. Tum Norman amplius iactare incipit se amicitiam cum claro viro iunxisse et omnibus petita promittere. Ob nimiam loquacitatem moderatrici legationis Israelianae aperit se sumptuosissimos calceos muneri Ministro Primario dedisse. Ex re gravia consequuntur: Ashel in magno periculo versatur ne de illicito commercio cum homine negotioso Neoboracensi reus sit. Cum Norman citatus sit testes in iudicio , vir politicus telephonice eum monet de re ingrata imminenti, sed simplex homo se illi semper fidum fore promittit. Omnibus rebus paratis magna calliditate, consilium capit , ut negotia iactata prospere eveniant, pro bono aliorum vitam profundere. Ex quo colligitur ut persona non tam inhonesta praebetur, quam cupida agnitionis pro auxilio aliis lato; miser homo quoquo modo inopiam celat, constanter fila auricularia ferens, eodem pallio obvolutus, cum tantum reditu locationis domus hereditate acceptae se sustentent, sed locus non ei sit in quo dormiat.

In hac pellicula histrio Richardus Gere peritia actionis excellit, agens partes senis inopis, qui tamen erga omnes dignitatem servat. Regimen spectaculi et scriptura scaenarum dispositoris Josephi Cedar optime tractant de multiplici hominum societate; tempora et mores hodierni verisimiliter effinguntur.

Scripsit Lydia Ariminensis