FABULA DE AMORE ET TENEBRIS

A TALE OF LOVE AND DARKNESS USA 2016

Genus tragicum

Regimen spectaculi: Natalia Portman. Scriptrix scaenarum: Natalia Portman. Histriones maximi momenti: N. Portman, Shira Haas, Gilad Kahana, Amir Tessler.

Opus filmicum sumptum a descriptione vitae scriptoris Israeliani Amos Oz c.t.e. “Fabula de amore et tenebris” (Anglice “ A tale of love and darkness”), ut primum experimentum regiminis spectaculi ab artifice scaenica Natalia Portman laboriose gestum, non omnino spectatoribus de exitu persuadet . Difficillimum equidem sumere ab opere litterarum tam composito et amplissimo quiddam perfectum, praesertim cum liber per rationem “fluxus conscientiae” et historiam et vitam scriptoris Israeliani narret. Eventus varii spectant ad annos post secundum bellum mundanum antequam civitas Israelis rata habita sit, cum multitudo Hebraeorum in Palaestinam congregati sint ut vexationem nazistarum vitarent. Tamen, constituta re publica Israelis, cum gentibus Arabicis bellum incipit; inopia, mors, ruina praevalent.

Fania, persona princeps, qua mater scriptoris efficta est, vigilans somniat. Coniuncta feliciter matrimonio cum viro doctissimo, vitam degens inter libros domesticos, saepe heroem pulcherrimum, epicum mente fingit, miras fabulas a se inventas filiolo Amos narrat: deinde, transactis nonnullis annis, a rebus veris secedere videtur nec quicquam fabulosum, ut solebat, iam explicat. Etiam patria spem fefellit. Ditiore familia nata in Europa Orientali, Israel “terram lacte et melle perfusam” animo conceperat, cum prorsus totum contra esset. Paulatim in animi aegritudinem incidit et viam fatalem ingreditur. Quae tragoedia quodammodo occulta spectatori exsistit, non talis fortasse lectori videtur.

Scripsit Lydia Ariminensis