Annus
2 0 1 7


[Imperator Poenus in terra Sicilia bello Karthaginiensi primo obviam Romano exercitui progreditur, colles locosque idoneos prior occupat. Milites Romani, uti res nata est, in locum insinuant fraudi et perniciei obnoxium. Tribunus ad consulem venit, ostendit exitium de loci importunitate et hostium circumstantia maturum. “Censeo, inquit, si rem servare vis, faciundum, ut quadringentos aliquos milites ad verrucam illam ire iubeas eamque uti occupent, imperes horterisque; hostes profecto ubi id viderint, fortissimus quisque et promptissimus ad occursandum pugnandumque in eos praevertentur unoque illo negotio sese alligabunt, atque illi omnes quadringenti procul dubio obtruncabuntur. Tunc interea occupatis in ea caede hostibus, tempus exercitus ex hoc loco educendi habebis. Alia nisi haec salutis via nulla est”. Consul tribuno respondit, consultum istuc quidem atque providum sibi viderier: “ Sed istos, inquit, milites quadringentos ad eum locum in hostium cuneum quisnam erit qui ducat?” “Si alium, inquit tribunus, neminem reperis, me licet ad hoc periculum utare; ego hanc tibi et rei p. animam do”. Consul tribuno gratias laudesque agit. Tribunus et quadringenti ad moriendum proficiscuntur. Romani milites circumveniuntur, circumventi repugnant. Fit proelium diu anceps. Tandem superat multitudo. Quadringenti omnes cum uno, perfossi gladiid aut missilibus operti, cadunt.] (Gellio, Noct. Att. III, 7) Dii immortales tribuno militum fortunam ex virtute eius dedere. Nam ita evenit: cum saucius multifariam ibi factus esset, tamen vulnus capiti nullum evenit, eumque inter mortuos defatigatum vulneribus atque quod sanguen eius defluxerat, cognovere. Eum sustulere, isque convaluit saepeque postilla operam rei p. fortem atque stenuam praehibuit. Sed idem benefactum, quo in loco ponas, nimium interest. Leonine Laco quidem simile apud Thermopylas fecit, propter eius virtutes omnis Graecia gloriam atque gratiam praecipuam claritudinis inclitissimae decoravere monumentis, signis, statuis, elogiis, historiis aliisque rebus; gratissimum id eius factum habuere. At tribuno militum parva laus pro factis relicta, qui idem fecerat astque rem servaverat.

Scripsit Johannes Teresi



Retro ad:

Novissima editio
Summum paginae