DE NOVO PARLAMENTO ITALICO ELIGENDO

Praeses rei publicae comitia indixit

Hesterno die Praeses rei publicae Italicae Sergius Mattarella, expleto legislatorum quinquennio, ex lege Constitutionis, senatum legationemque popularem dimisit decrevitque comitia die IV mense Martii novo anno habitum iri. Antequam hoc decrevisset apud Quirinalem Ministrum Primarium Paulum Gentiloni, deinde Praesidem Senatus Petrum Grassum et Praesidem Consilii legatorum populi Laura Boldrini acceperat. Tamen, certis finibus et terminis statutis ex legibus et Charta Constitutiva, ex consuetudine, ut ait Gentiloni, non fiet intermissio gubernandi, praesertim cum Italia post gravissimum discrimen rursus vigeat.

Usque ad hoc tempus opinionum explorationes nihil certum de exitu prospiciunt: nulla factio victrix esse videtur, cum quadraginta partes ex centum non ferat, sine quo numero suffragiorum administratio nisi nixa maiore parte legum latorum fieri non potest. Etiam coetus partium sinistrarum et dexterarum ancipites extant, quamvis hae paulo fortiores nunc ostendantur; factio Quinque Stellarum extra greges satis stabilis manet nec potest provideri quanto pondere futura sit, si cum aliis gubernare constituat. At in praeconiis comitialibus multa, ut in spe est, novantur.

Scripsit Lydia Ariminensis