ADMINISTRI NOVI IN AUSTRIA A PRAESIDE SUNT INAUGURATIGubernatio ad dexteras partes vergit
Postquam duos fere menses populares (ÖVP) cum factione libertatis (FPÖ) de
coitione facienda egerunt, Alexander van der Bellen, praeses rei publicae,
Sebastianum Kurz , cancellarium designatum, novosque administros hodie
inauguravit. Quem ritum quod non solum aequo, sed amico animo absolverit,
pauci scilicet mirati sunt, praesertim cum antea plus semel dixisset se
factionem libertatis ad administrationem rei publicae non admissurum, quia
inimico animo erga Unionem Europaeam esset. Sed quid faceret? In comitiis
mense Octobri habitis cives non solum popularibus, sed etiam factioni
dextrae adeo faverunt, ut voluntatem populi prorsus neglecturus fuerit, si
illi administrationem negavisset.
Sed consiliis ad rem publicam regendam propositis non est, cur quisquam
timeat, ne Austria ab Unione Europaea deficiat vel in dominationem
commutetur. Non est dubium, quin pauci, qui inaugurationi reclamaverunt,
non clamaturi fuerint « Nazistae abite ! » , si aetatem Nazistarum
sceleraque eorum ipsi vidissent.
Scripsit Volfgangus Austriacus
|
|
