MERKEL INTERPELLATIONES HERDOGANII RECUSAT

Praeses Herdogan concives monuit ne factionibus Turciae infensis suffragia ferrent

Angela Merkel, cancellaria Germanica, molestissime tulit, quod Recep Erdogan, praeses Turciae, certamini suffragatorio se interponeret. Omnes cives, eos quoque, qui natione Turca essent, ius habere magistratus libere creandi. « Qualescumque interpellationes », inquit, « vehementer recusamus. »

Erdogan iam antea Turcos, qui in Germania ius suffragandi habent, monuit, ne in legatis ad conventum foederalem creandis factioni democraticae sociali neu democratis Christianis neve ipsis “viridibus” suffragarentur, qui Turciae inimici essent. Quod tantae discordiae inter utramque civitatem essent ortae, culpam apud neminem esse nisi apud Germanos. Factiones supra dictas populum contra Turciam sollicitare, ut plures suffragatores haberent.

Quae dicta ab omnibus acerrime vituperabantur. Sigmar Gabriel, cui res externae sunt commissae, “Numquam antea factum est”, inquit, “ut quis liberae rei publicae nostrae tam impudenter interposuerit.” Gabriel Germanos Turca natione evocavit, ut suffragiis interessent. Erdoganum civitatem , quae libertate, democratia et iuribus staret , evertere velle.

Etiam Atila Karabörklü, praeses vicarius communionis Turcorum, qui sunt in Germania, dixit illum civitati dividendae studere.

Scripsit Volfgangus Austriacus