TRUMP DE VI ADHIBENDA IOCATUS ESSE DICITUR

Praeses Americanus ad maiorem acerbitatem in comprehensos hortatus est

Nullus fere dies praeterit, quin res mirae e Domo Alba in publicum proferantur.

Sara Sanders, locutrix praesidis, dixit eum nuperrime „tantummodo esse iocatum”, cum diceret iis minus parcendum esse, qui a custodibus publicis comprehenderentur. Trump die Veneris in oratione ad custodes publicos habita dixerat se probaturum esse, si maior vis in homines comprehensos adhiberetur. Quae dicta praesidis in Civitatibus Unitis acerrime vituperabantur. Quin etiam ii, qui custodibus publicis praefecti sunt, verba illius „iocosa“ reiciunt subditosque suos hortantur, ut legibus obsequantur.

In Civitatibus Unitis saepissime fit, ut nimia vis adhibeatur in hominibus comprehendendis. Praecipue homines nigro colore semel atque iterum vulnerabantur vel etiam necabantur nullo in custodes vindicante.

Scripsit Volfgangus Austriacus