MENSIS IUNIUS "MAIO" NON FAVIT

Subsellia factionis conservativae Anglorum imminuta sunt

Mense Iunio praeteriti anni maior pars civium Regni Uniti Brexitum decreverunt: hoc anno eodem mense Ministra Primaria Theresa May, factionis conservativae, numerum suffragiorum maximum non tulit ut magna vi et auctoritate asperum exitum ab Europa statueret, immo e comitiis ante tempus habitis imminutio subselliorum secuta sunt , CCCXVIII pro CCCXXVI necessariis sine sociis ad administrandum. Contra auxerunt Laboristae quibus CCLXII sellas Britanni tribuerunt.

Qua re a multis rei politicae viris senatus legatioque popularis existimantur necessitati “suspensi” conflandi cum gregibus minoribus societatem ut administratio debilis institui possit. Hodie Georgius Osborne, conservativus, qui iam fuit minister rei nummariae publicae adfirmare ausus est: “Theresa May mortua ambulans est, mox casura”.

Plurimis instantibus ut munus deponeret, cognito suffragiorum exitu, ante triduum Prima Ministra ad reginam Elisabetham se contulit ad novam gubernationem auxilio Unionis Hiberniae Septentrionalis apparandam. Se Britanniam in pactionibus de exitu ab Europa acturam esse, securitati ab Islamismo consulturam. “Nunc ad operandum eamus!” sic demum declaravit.

Quid de Brexitu? Eritne mollis ? Victis partibus conservativis sunt qui putent commercii bellum cum Europa vitari posse nec impediri quominus cives Europaei libere in Regnum Unitum adeant. Tamen ingentissima compensatio damni Britannis reposcetur.

Scripsit Lydia Ariminensis