CERTA AGNITIO PETITORIS FACTA EST

Duplex ius civitatis habens, etiam tertius interfector caedis Londiniensis agnitus est

Die tertio mensis Iunii vespere Londinii novus incursus terroristicus factus est: parvum autocinetum onerarium immissum tortuosum in viatores per Pontem Londiniensem usque ad Mercatus Vicum, ubi multae potoriae tabernae sunt, caedem perpetravit. Contra quarum unam postea vehiculum iactatum est, sed iampridem tomocratae, cum ex eo descendissent, strictis cultris, praetereuntes aggressi sunt: VIII eorum perierunt, LIV sauciati.

Tres petitores, indutis falsis cingulis ad dirupendum, a biocolytis occisi sunt; Khuram Butt Pakistanus et Rachid Redouane incertae stirpis Africae Septentrionalis, domicilio habito in vico Londiniensi Barking, mox agniti sunt, tertius quis esset ante biduum nuntiatum est: Youssef Zaghba, duplici iure civitatis, cuius pater Maurus, mater Itala Bononiensis, Bononiae certis temporis spatiis vixit: mense Martio prioris anni retentus erat in Turciam aëronavi profecturus: nam custodes publici finium in suspicionem venerunt cum tantum ei parva sarcina esset, sine pecunia nec tessera vectoria ad redeundum: praeter syngraphum, telephonium mobile ademptum est, inventis imaginibus regnum Chalifi extollentibus, deinde, domi suae computatrum et documenta informatica.

Tamen, cum nec liceret eum accusare de tromocratia nec expellere cum civis Italicus esset, dimissus est et omnia reddita. Omnibus rebus communicatis cum biocolytis Britannicis (Scotland Yard) extremo tempore Londinii degebat, nulla suspicione adfectus.

Scripsit Lydia Ariminensis