DIURNARIUS ITALICUS IN TURCIA DETENTUS EST

Gabriele Del Grande apud finem Syriacum comprehensus est

Die X mensis Aprilis diurnarius et historicus rerum recentiorum Gabriele Del Grande apud finem Syriacum a custodibus publicis Turcis comprehensus est et in Turcia apud sedem custodiae dispensationis detentus. Administer Italicus negotiis exteris praepositus ut liberaretur postulavit; plurimi pro eo ante Quirinalem, sedem Praesidis Reipublicae reclamaverunt. Ut a quibusdam auctoribus relatum est eodemque Administro de exteris Italico ille retentus est quod adesset in loco Turciae ad quem accedere non liceret, id est prope confinium Syrum.

Gabriele Del Grande scriptor est (blogger) ephemeridis interretialis (Fortress Europe) qua numerat narratque de rebus et naufragiis migrantium qui ab Africa Mare Mediterraneum transire conantur ut in Europam perveniant. Tamen commentarii desierunt die XVI mensis Februarii anno MMXVI. Scripsit autem symbolas in actis sinistrarum partium, tres libellos et chronica de bello Syriaco edita ab actis Italicis “Internationale”. Insinuatum est eum iter fecisse in Syriam auxilio rebellium Syrorum, praesidis Assad adversariorum. Difficile est veram causam custodiae in Turcia novisse, quae profecto rei politicae conectitur.

Telephonice dixit se bene valere, nulla vi allata, tamen omnia sua occupata esse, nullo scelere tributo. A nonnullis diebus ad reclamandum edere recusavit. Tandem ante biduum legationem Italicam convenit: nunc nihil edit, sed bibit, a medico inspectus; etiam cum patrono locutus est. Spes est ut mox e custodia dimittatur.

Scripsit Lydia Ariminensis