FOEDERA EUROPAEA LX ANNOS EXPLEVERUNT

Legati XXVII rerum publicarum anniversarium Unionis Europaeae commemoraverunt

Ante sexaginta annos Romae fundamenta Unionis Europaeae acta sunt: legati XXVII rerum publicarum, Regno Unito excepto, convenerunt ut foedera commemorarent subscripta die XXV mense Martio anno MCMLVII in exedra Palatii Conservatorum, quod nunc Musaei Capitolini sedes est. Tunc procuratores septem nationum, Francogalliae, Germaniae Occidentalis, Italiae, Belgii, Bataviae, Lucemburgi adfuerunt : res magni momenti fuit, cum a plurimis initium Unionis Europaeae reputaretur, quae anno MCMXCII foedere in urbe Maastricht comprobato completa est.

Foedera illo anno subscripta prius Communionem Europaeam de re oeconomica, alterum de vi atomica constituerunt . Illud sane gravius exstitit cuius consilium vectigalia portitoria auferendi inter respublicas fautrices effecit ut mercatus unicus institueretur.

Hesterno die relatores XXVII nationum faventium iterum magnam spem ostendentes in Urbe Unionis principia confirmaverunt, immo praeses Consilii Europae Jean-Claude Juncker se pro certo habere declaravit etiam centesimum annum celebratum iri.

Re vera pericula externa et intestina Europae minantur: tum terrorismus, transmigratio impellunt ad novos muros struendos, tum factiones adversae in singulis nationibus discessum fovent. Aes alienum, difficultas oeconomiae, condiciones vivendi dispares, discidia domestica, nimium studium nationis fundamenta Unionis quatiunt: post Brexitum timor est ne Francogallia digressum decernat.

Scripsit Lydia Ariminensis