LEGATUS AMERICANUS PERSONA NON GRATA

Moderatores Unionis Europaeae nolunt Malloch legatum Civitatum Unitarum fieri

Nonnulli Unionis Europaeae moderatores id agunt, ne Theodorus (Ted) Malloch legatus apud Unionem Europaeam fiat. Manfredus Weber, caput factionis christiano-democraticae, et Guido (Guy) Verhofstadt, qui liberalibus praeest, litteris missis Donaldum Tusk, praesidem Consilii, et Ioannem-Claudium Juncker, praesidem Commissionis, monuerunt, ne Malloch, familiarissimus Donaldi Trump, in officio legati comprobaretur.

Malloch nuperrime praedixerat Unionem Europaeam interituram Euronemque ad nihilum venturum. "Cum prius", inquit, "interitui Unionis Sovieticae studuerim, nunc nescio an sit altera Unio, quae coerceatur".

Weber et Verhofstadt “Dicta eius maligna”, inquiunt, “ea neglegere apparet, quae in Unione Europaea plurimum valent”. Si legatus Americanorum comprobatus ita loqueretur, rationes transatlanticas, quae superioribus decenniis pacem et prosperitatem in Europa praestitissent, labefactatum iri.

Dubium non est, quin futurum sit, ut praeses Americanus repudiationem legati in contumeliam vertat. Quamobrem sunt, qui sperent Donaldum Trump Theodorum Malloch legatum non designaturum.

Scripsit Volfgangus Austriacus