DE NOVO MURO IN AMERICA INSTRUENDO

Donaldus Trump constituit ut limes apud finem Mexicanum permuniatur

Tertio die ab incepto munere Praeses Donaldus Trump nuntiavit in percontatione televisiva murum quam primum structum iri ne migrantes in Civitates Unitas a Mexico inirent. Constat non id promissum esse fovendis suffragiis, sed veram rem esse, cum hodierno die decreto praesidiali ad aedificationem pecunia erogetur. Non tamen satis est: ut ipse confirmavit, res publica Mexicana totam impensam praestabit. Tempus solutionis in conventu proximae hebdomadae cum Praesidenti Enrique Pena Nieto positum est.

Alioquin decretum de migratione praenuntiatum est quo numerus migrantium et perfugarum imminuatur una cum aliis consiliis de securitate. Rem etiam ad cives Europae periegetas pertinere posse, ante aliquot dies Praeses Trump declaravit. Ipsa Unio Europaea ut Germaniae serva contempta est, Brexitus Regni Uniti contra collaudatus; vel societas NATO obsoleta reputatur. Quid de commerciis cum Russia? Exitus de negotiis exteris exspectamus.

Scripsit Lydia Ariminensis