NOVUS ANNUS EXITIALIS IN TURCIA

Nova caedes territorum Byzantii Kalendis Ianuariis effecta est

Post mediam noctem incipientis anni, vir armatus, in incerto est utrum solus necne, in tabernam nocturnam Byzantii iuxta Bosphorum irruit et horrendam caedem, displosis CLXXX glandibus, effecit: XXXIX perierunt et prope LXX, praesertim advenae, sauciati. Postea nefarius “Allah Akbar” clamans fertur exisse. Res scelesta in lauta taberna “Regina” nominata coorta est, ad quam periegetae, viri feminaeque clarissimi, pedilusores ventitare solent.

Imagines apparatus televisifici pro securitate positi hominem nigra veste indutum et cucullatum ostendunt qui, necatis duobus custodibus in limine, caeco impetu contra DCC qui aderant arma displosit; pars eorum in aquis Bosphori salutem petiverunt; V periegetae Itali incolumes sub quadam mensa fortunate manserunt. Sicarius relicta pyroballista praeceps fugit. Tota in Turcia magna insectatio territoris incepit.

Haec novissima est post tot caedes prioris anni in Turcia susceptas, sex saltem inter atrociores. Toto orbe reprehensio petitionis tromocraticae concors est; etiam Pontifex Franciscus se luctui Turcarum adiungi sermone expressit. Regnum Chalifi (ISIS) sibi petitionem vindicavit, ultum Muslimos in Syria necatos; Turcia autem serva Crucis vocata est.

Scripsit Lydia Ariminensis