GALLIA BRITANNIAQUE NOLUERUNT GERMANOS READUNIRI

Scandalum post viginti annos

Ante viginti fere abhinc annos, mense Novembri anni 1989, deletus est Murus Berolinensis, qui ab anno 1961 diviserat urbem Berolinam in duas partes. Quo facto incolis orientalis partis Germaniae a communistis (militibus Sovieticis nitentibus) administratae primum patefacta est via ad suos concives foederalis Germaniae visendos. Depositio muri autem putatur fuisse quasi mors systematis communistici ac primus ab anno 1939 dies libertatis in Europa orientali.

His autem diebus, viginti annos postea, acta Britannica "Financial Times" divulgaverunt adhuc secretas tabulas sermonum, quos tunc, anno 1989, inter se habuerunt principes Francogalliae et Britanniae, praesidens scilicet Francois Mitterand et ministra primaria Margaret Thatcher. Ex quibus tabulis clare patet nullum amborum maximi momenti in orbe occidentali politicorum voluisse Germaniam readuniri.

"Readunatio dabit cancellario Helmut Kohl maiorem potestatem, quam habuit Hitler, et Europa eo facto dolenter laborabit" - monuisse citatur praesidens Mitterand dominam Thatcher.

Scripsit Stanislaus Varsoviensis