NON OMNIBUS IN AETHERE MINGERE LUXURIOSE LICET

O latrinae, o mores!

Malos mores humanos non solum in mundo regnare, sed etiam orbitam terrae iam attigisse queritur cosmonauta Russus, Gennadi Padalka. Qui diurnariis actorum "Novaia Gazeta' dixit sibi - tempore praeteriti volatus cosmici, cum una cum astronautis US-Americanis in Internationali Statione Spatiali (ISS) tempus degeret - denegatum esse latrina Americana uti, etiam tempore cum Russicam latrinam collega quidam occupabat. Neque potuerit bicyclo (birota) stativo Americanorum uti ad corpus exercendum. Ut recordatur 50 hodie annos natus Padalka, talias difficultates deesse tempore primi sui volatus anni 1998, res tamen peiores redditas esse postquam "volatus commerciales" (i.e. peregrinatorum privatorum, qui pro volatu magnam pecuniam solvunt) anno 2003 haberi coepissent. Ab hoc temporis momento Russi et US-Americani, qui loca sua peregrinatoribus praedivitibus - ut novissimus viator cosmicus, negotiator computatralis Charles Simonyi, qui 35 miliones dolariorum pro itinere solvit - in statione cosmica praebent, inter se acriter aemulantur, dum astronautae aliarum gentium rebus ita stantibus obstupescere Padalka videntur.

Padalka bis in aetherem adhuc missus nunc ter astra est petiturus, cum erit etiam dux ISS. Ante novissimum volatum cosmonauta Russus rogavit NASA (id est Administrationem US-Americanorum Aeronauticam et Spatialem) utrum ut ductori stationis licuerit ei latrina bicyclove uti, responsa tamen de hac re recepit ambigua.

Scripsit