FESTUM SANCTI SILVESTRIS IN PLENO AEQUORE?

Tesserae "Libertati Marium" iam fere desunt

Tempore diei sole apricari, postmeridie ludum bascaudae ludere, deinde pellicula novissima in cinematographeo spectanda et cena luxuriosa in una viginti cauponarum. Noctu saltatio in discotheca aut, si ita mavis, stellarum adoratio in specula astronomica, mane natatio in piscina atque dimidiae horae cursus pedester. Si praeterita nocte nimis peccasti, sacerdos confessor iam te cum absolutione exspectat in sacello. Tali modo potestis, lectores, tempus Novi Anni pergere, omnino pede terram non tangentes. Manebitis enim in una permagnarum navium vectoriarum, quae olim quoque in Europa et USA naves transatlanticae nuncupabantur.

Tesserae ad itinera temporis circa diem Natalis Domini Novique Anni iam fere omnes emptae sunt, si vis ergo, lector, tam luxurioso modo diem (seu potius noctem) sancti Silvestris agere, citissime consilia fac! "Regina Maria II" (Queen Mary 2) advehet te in Curacao, Grenadam, insulam sancti Thomae et postea in Novum Eboracum. Maxima autem in mundo (quindecim tabulationum!) navis "Libertas marium" (Liberty of the Seas), quam photographema supra monstrat, te, ut unum quinque milium vectorum, ducet e portu Miamensi civitatis Floridanae in Mexicum, Belize insulasque Caimanas. In hac navi potes quoque montes rupesque praeruptas (licet sint artificiales) ascendere, pugnam pugillatoriam aut patinationem in glacie exercere.

Optimum ergo tibi Natalem Novumque Annum! De pretio autem itineris hic non est disputandum...

Scripsit Stanislaus Varsoviensis iconoclastes.blog.onet.pl