Academia Platonos

Direxit Philippos Tsitos, in scaenam reduxerunt Alexis Kardaras et Philippos Tsitos; partes maximi momenti egerunt Antonius Kafetzopoulos, Anastas Kozdine, Titika Sarigouli , imagine curavit Polideucis Kirlidis, extruxit Demetrius Peponis, scaenas curavit Spyros Laskaris, vestimenta delexit Christina Chatzaridou, musicam curavi t Enstro, produxerunt Pan Entertainment , Twenty Twenty Vision (Graecia - Germania, MMIX)

Stauros vir Hellenicus est, qui in insula Atheniensi Academia Platonos vitam quietam degit, totum diem ante ephemeridum tabernulam suam assidens et cum amicis de nugis colloquens. Stauri mater aetate provecta cum filio suo vivit, dementia in dies increscenti affecta; uxor eum dereliquit frustra amorem perditum quaerentem. De qua re colloquitur Stauros cotidie cum amicis suis pariter otiosis? De migrantum crebra invasione, qui ex terris propinquis sicut Epiro aut remotis sicut Sinis operam suam daturi in urbem veniunt. Etiam canis quidam sic edoctus est, ut Epirotas latrando agnoscat. Ita semper eadem vita transire pergit.

Quietem verorum Graecorum perturbat dubium novum et terribile Stauri ipsius in venis Epirotarum sanguinem perfluere: quam suspicionem operarius quidam in omnium mentem infundit, mater confirmat, neque personis neque spectatoribus verum pellicula perfecta perspicuum erit.

Parum ornamentis decora sed meditationi apta est narratio, qua homines veri non ioculares personae effinguntur. Discrimen acre non modo Graecorum sed omnium Europae incolarum eleganter et lepide ostenditur, qui inopinate non amplius dominos domi suae sese putant. Variis animi motibus brevi tempore perturbatur primi histrionis vultus, sicut dubio poena impotentia ira amore, sed super omnia moestitia dominatur ipsius oculis et conspectu mire acta: cui tributum est Locarni premium ut optimo actori. Sed spectator Europaeus inde se interrogat: utra est vita vera? utrum fiducia eius, qui semper ibidem habitat, an incertum migrantis?

Scripsit Herimannus Novocomensis