REPERTUM ESSE VETERRIMUM INSTRUMENTUM MUNDI

Tibia Sueviana

Hanc tibiam praeterito autumno repertam in spelunca neolithica Hohle Fels (in Iura Suevica Germanorum) studiosi Germani Britannique modo aestimaverunt esse aetate triginta quinque milium (35.000) annorum, sit ita veterrimam non tantum tibiam, sed etiam cuiuslibet generis instrumentum per totum orbem terrarum. Adhuc verustissima instrumenta nobis nota erant tibiae repertae in speluncis Galliae et Austriae, quae tamen putantur esse aetate "tantum" circiter 30.000 annorum. Tibiam Hohlenfelsianam factam esse ex ossibus vulturis, atque servatam in tribus partibus, optima in condicione.

Plenissimam miraculorum esse cavernam illam Hohle Fels. Mense Maio ineunte ab archaeologis monstrata est inventa in eadem spelunca statua mulieris aetate quoque 35.000 annorum. Quam "Venerem Suevianam" ex ebore mammutheo factam esse vetustissimam sculpturam mundi adhuc repertam. Investigatio ambarum repertionum peracta est grege studiosorum, duce professore Nicholao Conard Universitatis Tubingiensis.

De "Venere Sueviana" scripsit "Ephemeris" in rubrica scientiarum die 14 Maii huius anni.

Scripsit ANL