GRAVES CRUDELESQUE VEXATIONES IN LUDO PRIVATO ADVERSUS PARVOS PUEROS DETECTAE SUNT PISTORII, IN URBE IN TUSCIA SITA.

Animos maxime commovit hoc crimen paucis ante diebus non solum parentum et illius civitatis civium sed etiam omnium Italiae civium. Aliquid insolitum parentes in pueris diem ex die animadvertebant: erant qui in corpore aliquam rubram maculam habebant, qui flebant in somno, qui repudiabant ludum eiusque magistras, qui insolitos lusus fieri narrabant (segregari in armario) et cetera. Tristes et pueris maxime timentes, miseri parentes praetorem urbanum adierunt atque ab eo petiverunt ut quam primum investigatio de rebus a pueris relatis fieret. Collocatae sunt in ludo (quem in imagine adposita aspicis) machinae minimae dimensionis, aptae ad percipiendas imagines, investigatis inscientibus.

Gravia crimina adversus parvos pueros imagines ostenderunt: infans decem menses natus percussus quia nolebat edere, puer percussus et manducare coactus cibum quem vomuerat, puer in armario segregatus, puer poena affectus et in parva sella extra ludum collocatus algens. Duo mulieres in vincula tractae sunt in iudicium venturae, quo facto omnes sperant eas maxima poena punitum iri. Cessavit angor, manet maeror ob crudelem nequitiam in pueros innocentes, timent autem parentes ne pueri animis magis quam corporibus laesi sint. Hoc maxime eis curae est.

Scripsit Dominicus Gallipoli