DE SCRIPTO QUO DE SILVIO BERLUSCONI NARRATUR: LYCAEI RECTOR MAGISTRAM DEFENDIT

“Scriptum ex inscriptione interretiali praeclara ablatum est: erraverunt acta diurna!”

Telephonium lycaei scientifici Vecchi multo mane resonare coepit. Lucianus Gigante, rector lycaei, in media re politica nationali invite proiectus est. Scriptum de Silvio Berlusconi, quod magistra lycaei discipulis classis tertiae C convertendum commisit, pyrobolum factum est displosurum quod illi innocuum reddere contigit.

“Clamorem istum nimium minime intellego! Il Giornale gravissime erravit!” Lucianus Gigante dicit scriptum illud ex inscriptione interretiali extractum esse (http://www.alcuinus.net/ephemeris), qua in hodiernam linguam Latinam convertuntur facta aevi nostri quae in toto orbe evenerint. “Auctores Ephemeridis - ait - magistris efficax instrumentum praebent ad linguam Latinam in sermonem hodiernum convertendam itaque discipulos alliciendos. Si inscriptionem interretialem visitaveris plurima facta hodierna Latine scripta comperies. Sermo Latinus ceterum vivus et flexibilis est, mire aptus et renovationi et commutationi: hoc ex litteris encyclicis Romani pontificis intelligitur. Paulo ante magistra eadem scriptum de morte Michaëlis Jackson convertendum commiserat, quod discipuli diligenter et iucunde perfecerunt propterea quod sibi res nota esset. Nihil turpe neque absurdum in hoc est.”

Ergo de procella in scypho agitur. “Adolescentes obstupuerunt, tantus clamor eos perturbavit. – inquit – Ego tranquillus sum, nam multi discipulorum parentes mihi aestimationem et amicitiam ostenderunt. Nullam quisquam opinionem politicam divulgare voluit.”

Ephemeris diarium est per interrete divulgatum, ubi omnes nuntii lingua veterum Romanorum exprimuntur, Varsoviae a studiosorum, peritorum et collaboratorum manipulo totius mundi conditum. Cum septimanatim renoventur nuntii, haec inscriptio aliquid unicum est in interreti. Ephemeris ab initio de omnibus maximis factis mundanis scribere solita est, e. g. de comitiis praesidentialibus in USA, de Olympiis Pechinensibus, de bello Iraquico, de discriminibus in oriente medio. Praeter consuetas partes, sunt etiam rubricae de historia Europaea, de hominum illustrium vitis, de cinematis, de poësi, vel crucigrammata et praecepta coquinaria.

Ephemeris certam auctoritatem sibi conquisivit inter acta interretialia. Consilium nuntios Latinos divulgandi primum “Nuntiis Latinis” apud Finnos exortum est.

Trani, a. d. III Idibus Novembribus MMIX

Scripsit in linguam Latinam reddens Herimannus Novocomensis ex actis interretialibus Traniweb