Anglus Kevin Pietersen captat lagoenam aquae prima serie certaminis cricetici inter Angliam et Australiam Cardifiae Cymbrorum habiti.

Iamaicanus athleta Usain Bolt sudore aquaque imbris madentem camisiam deponit post cursuram 200 metrorum caelo immiserabiliter pluente Lausanio Helvetorum.

Pedilusor mundi praeclarus Cristiano Ronaldo a turba fautorum laudatur cum annuntiatum officialiter esset eum a Manucianis Unitis traditum iri Regalibus Matritensibus pretio 80 milionum librarum Britannicarum.

Fautor manus pedifollicae Velez Sarsfield a siphonariis adiutus celebrat victoriam suorum (proportione portarum 1:0) in certamine ligae Argentinianae finali contra Bonearopolitanam Huracan.

Aetate 99 annorum abavia Ruth Frith exercet artem globum iaciendi centum diebus ante initium ludorum Sydneiensium 2009 World Masters Games.

Suam quoque artem exercet in via ad Limoges Gallorum birotarius US-Americanus Lance Armstrong, qui septies in cursura Circuitus Galliae (Tour de France) triumphavit.

In vico Caledonico (Scotico) Turnberry US-Americanus pilamalleator Tiger Woods nona iam semita ludit, se comparans ad 138. certamen annuale British Open Championship, quod incipit 16 die Iunii.

Bascaudarii Wallabiani etiam sine luce ludum saltusque exercere amant in stadio Sydneiensi Brookvale Oval.

Ludus follis aquatilis remigum monoxylorum satis saepe habetur in lacu urbis Kaosiung Formosanorum.

Scripsit ANL