Quid post sententiam fieri possit.

Neglectis omnibus, qui magis magisque urgent, nullum est indicium iudices Aung San Suu Kyi absoluturos et liberaturos esse, cuius patroni se caute bona sperare dixerunt. Minister Burmensis rebus externis Maung Myint, qui cum legatis Unionis Europaeae et Asiae extremae in Cambodia convenit, "neque nos urgendi - inquit - neque deliberationes nostras permutandi voluntates accipiemus, nam actio in dominam Aung San Suu Kyi ad nostras tantum leges pertinet." Ex quo tempore dux democraticorum accusata est, quod regulas custodiae suae domesticae violavisset, inexspectata vi toto in orbe reclamatum est, vel a Societate nationum Asiae ad meridiem et orientem vergentium (ASEAN), quae usque ad hunc diem Burmae rectores sustinuit.

Vehementer locuti sunt aliquot primates. Baracus Obama, Civitatum Americae Unitarum praesidens, "Tempus est, - ait - Burmae rectores omnibus accusationibus in Aung San Suu Kyi desistere eamque cum captivis sodalibus liberare." USAe regimen clementior in Burmam fieri coeperat, sed post mulierem comprehensam poenas oeconomicas in civitatem illam ingravavit. Gordon Brown, minister primarius Britannicus, firmiter procul captivae ipsi locutus est: "Ego vocem meam choro increscenti coniungo illorum, qui liberationem tuam postulare pergunt. Diu totus orbis nihil egit, istam iniuriam non tolerandam tolerans. Nihil commutatur! Clamor ad te liberandam in Europa Asia et ubicumque augescit. Nobis omnia perficienda sunt, ut natalis tuus (id est dies XIX mensis Junii) ultimus in captivitate sit."

Ordinis NationumUnitarum consilium securitatis diutius silere non potuit, sollicitudinem tam de mulieri comprehensa et in iudicium delatam quam de Burmae discrimine caeco patefecit. ASEAN, cuius mos est socios suos non reprehendere, comprehensionem illam ceterorumque oppositorum dixit laudi suae infregisse; vel regimen Thailandiae, quod hodie nationum societati praeest, sollicitum est de iudicio necnon de Aung San Suu Kyi valetudine.

Quibus omnibus surdi sunt Burmae rectores: heri minister rebus exteris "Causa haec - inquit - minime politica est, ideo suffragia generalia compluribus competitoribus intervenientibus anno proximo habebuntur, sicut provisum erat." Ita res se habent: patroni putant ream post paucos dies trium aut quinque annorum captivitati condemnatum iri post litem accurate confectam. Quid ergo? quid a rectoribus sicut Obama et Brown, quid a societatibus sicut ONUs consilio securitatis et ASEAN exspectandum est? Paulus Sergius Pinheiro, qui ut ONUs legatus iuribus humanis in Burma violatis diu studuit, consilium securitatis hortatur ut de sceleribus a rectoribus perpetratis exquiratur, ut ipsi ante tribunal mundanum deferantur. ASEAN Burmam ad tempus expellere possit, quod societatis famae grave incommodum afferatur. Duces sicut Obama et Brown operam dare possunt cum nationum societatibus, id est cum Ordine Nationum Unitarum, Unione Europaea, Societate nationum Asiae ad meridiem et orientem vergentium, necnon cum Burmae proximis amicis sicut Sinis India Russia, quae commercia sua servare malunt iniurias ibi perpetratas neglegentes.

Omnes hoc unum egent: voluntatem politicam.

Scriptum hoc in actis interretialibus ab oppositoribus Burmensibus confectis www.irrawaddy.org die XXIX mensis Maii anni MMIX editum est et in linguam Latinam conversum est.

Scripsit Herimannus Novocomensis