Christiani Orthodoxi, asseclaeque ecclesiae Armeniacae, Coptiticae necnon nonnullarum aliarum ecclesiarum celebrabant hac fine septimanae festum Paschatis. Una hebdomade scilicet post Catholicos Protestantesque - hi enim Gregoriano, illi vetere Iuliano calendario utuntur.

Moscoviae in ecclesia cathedrali missae sanctae aderant ab uxoribus stipati praesidens Demetrius Medvedev et minister primarius Vladimirus Putin.

Etiam in vicina Georgia, quacum contentio diplomatica regimini Russorum est de potestate super Abchasiam Osetiamque, Pascha sollemniter celebrabatur. In urbe capitali Tbilisi missae sanctae aderat praesidens Micheil Saakasvili cum familia.

Nonne pulchre se preaebent noctu Sabbati Paschalis urbs princeps Bulgarorum, Sophia? Pompa credentium circumit ecclesiam cathedralem at candelae, quas portant, in photographemate fulgent quasi luminaria neonica.

At Kieviae Ucrainensium anula quaedam vesta alba induta in mentem vero inducit manes veterum ad sollemnitatem advenientes. In lumine candelarum omnia supernaturaliter videntur...

Cairo Magnae Aegyptiorum papa ecclesiae Coptiticae, Senouda III, benedictionem misit 58 milionibus huius fidei asseclarum.

Pueri Macedonici maxime autem gaudent tempore Paschatis ovis tinctura pictis comedendis.

Scripsit ANL