Annus
2 0 0 9


Good'

De adipe obscuro

Duo sunt in hominum corporibus genera adipis, quorum alter albus alter obscurus appellatur; cum prior energiae congerendae et servandae aptus sit, posterior puerorum proprius calorem promanans motusque alens comburitur. In Instituto Bostonensi Joslin diabetae curando addicto studiosi collegerunt etiam in adultis obscurum adipem inesse, eo copiosiorem quo tenuior est homo. Haec in scripto nuper in Actis Medicis Neoanglicis (New England Journal of Medicine) edito referuntur, ideo novae rationes diabete aegrotantes curandi effinguntur: nam fieri potest, ut adeps obscurus medicamentis impositis adeo increscat ut hominis pondus moderetur aptiusque glycosium concoquatur.

Ex duobus milibus adultorum diligentibus investigationibus observatis, in trium et triginta collis adipis obscuri acervula comperta sunt; studiosi vero putant in pluribus idem factum esse, sed machinis hodiernis minima coacervula animadverti non posse. Praeterea compertum est adipem obscurum abundare in iunioribus et tenuioribus hominibus et in illis, quorum in sanguine minus glucosii inerat necnon tempore hiemali, cum corporis calefactionis opus est. "Adipis obscuri abundantia - ait magister Ronaldus Kahn - efficax in pondere moderando et in glycosio concoquendo esse videtur." Cum studiosus idem proteinum compererit "BMP 7" appellatum, quo in muribus adeps obscurus augescat, tam diabeticis quam obesis nova medicamenta futuro tempore inde excogitari poterunt.

Scripsit Herimannus Novocomensis



Retro ad:

Novissima editio
Summum paginae