Regina subirata

Londinii rectores viginti nationum, qui de difficultatibus oeconomicis disputaturi convenerant, in regia Buckinghamensi Elisabetham Angliae reginam visitaverunt; deinde ante apparatus photographicos constiterunt, ut salutationis memorabilem imaginem diurnariis praeberent. Confestim vox hilaris resonuit clamans: "Domine Obama!"; regina cito se convertit clamorem inopinatum fastidiens dicens: "Quis est iste? cur clamat?". Nihilo minus nuntius regiae familiae negavit Elisabetham perturbationem in contumeliam accepisse.Visitatores situs interretialis YouTube, quo mox breve cinema translatum est, catervatim imagines, quarum una adponitur, aspexerunt.

Quis coram reginam clamare ausus est? Minister primarius Italicus Silvius Berlusconi!

Scripsit Herimannus Novocomensis