Quot planetae inhabitantur?

Caeli studiosi putant trecentas unam et sexaginta saltem intelligentum communitates in galaxia nostro vivere, qui numerus usque ad duodequadraginta millia increscere possit. Haec referunt Acta Mundana Astrobiologica (International Journal of Astrobiology). Si nihilo minus maxima existimatio vera sit difficillime fieri possit, ut terrestres cum planeta quolibet alieno communicare possimus. Quamquam investigatores saepe probabilitatem vitarum intelligentium in rerum natura existiment, forte studia illa magnopere afficiuntur: recentissime numerus a nullo usque ad decies centum milia dictum est.

"Nam ita ignorantiam nostram re vera existimamus." ait Duncanus Forgan magister universitatis Edimburgi, qui articulum edidit: ipse galaxiam nostro simillimum effinxit ubi systemata solaria eadem ratione progrediuntur, qua in nobis proximis exoplanetis (ita appellantur planetae extra systema solare nostrum) evenisse observatum est: secundum tria exemplaria res permutari putantur.

Iuxta primum exemplar, difficillimum est vitam exoriri sed facilius progredi: unde trecentae una et sexaginta intelligentum communitates in galaxia numerantur. Iuxta secundum exemplar facile est vitam creari, difficillimum ad intelligentiam pervenire: ita unum et triginta millia quingentae tredecim vitae modi esse existimantur. Si denique (hoc est tertium exemplar) cellulae vivae ab alio ad alium planetam per asteroidas collidentes transmigrent, triginta septem millia nongentae quattuor et sexaginta intelligentum communitates galaxiam nostrum incolere putantur. Incertum tamen est quam diu exspectandum est a vitae ortu primo usque ad intelligentum communitates, quod admodum varium esse potest: magister Duncanus putat terrae nostrae exemplum dimidium existimari posse.

"Hoc tamen - inquit - pro certo habendum est, nos partem tantum rerum effinxisse. Nam minime certum est nos cum alienigenis viventibus re vera communicare posse; ceterum omnino ignoramus cui rei similes viventes illi sint atque qui mores eorum."

Scripsit Herimannus Novocomensis