Usque ad annum MMXX

Liu Xiaobo, ante annos viginti comprehensus post reclamationes in foro Tiananmen habitas, tribunali Pechinensi damnatus est: per undecim annos in carcere manebit. Patronus Shang Baojun dixit se de provocatione cum captivo collocuturum esse, tantum enim custodiae temporis intervallum non exspectabatur. Uxori post damnationem licuit virum suum visitare, quod custodes publici eam domo exire vetuerant. Liu Xiaobo, tres et quinquaginta annos natus, domi captivus a mense Decembri MMVIII usque ad Junium MMIX mansit, deinde in carcere detentus est: ab iudice vel quidecim annorum captivitati damnari potuisset. Astynomorum nuntius eum dicit "perturbationum auctorem et regiminis obtrectatorem, rei publicae et socialismo subvertendae deditum". Anno MCMLXXXIX iuvenis magister particeps fuit cum discipulis suis reclamationibus in foro Tiananmen; quam ob rem in custodia per biennium mansit. Anno MCMXCV iterum comprehensus est, quod documentum iura humana vindicans subscripsisset et divulgasset.

Regimen Civitatum Americae Unitarum sollicitudinem propter damnationem patefecit, captivi dimissionem et libertatem placide reclamantibus ab auctoritatibus postulans.

Scripsit Herimannus Novocomensis