De emissionibus obnoxiis moderandis

Ditissimarum civitatum ministri rerum naturae tuendae addicti de documento Hafniae redacto proximis diebus agent, quo reductio emissorum gasorum proponitur quibus caeli calefactio a plerisque studiosis tribuatur: anno bismillesimo et vicesimo emissionum reductio a XXV ad XL centesimas praevidetur, si cum anno MCMXC comparentur. Usque ad hunc diem de XVIII centesimarum deminutione tantum dictum erat. Ad hoc Unio Europaea decem miliones dollariorum proximo triennio egenis nationibus, praesertim Africanis et insularibus, se daturam esse pollicetur quo melius caeli commutati consequentias repugnent. Rectores tamen inopum civitatum cum societatibus beneficis negant eam pecuniae summam satis esse difficultatibus imminentibus subeundis et superaddunt eam plerumque iam promissam aliterque appellatam esse.

Multitudo reclamantum in Hafniae viis forisque graviores deliberationes a mundi potentibus postulaverunt: toto ex orbe pervenerant ut iura populorum siccitate et inundationibus affectorum defenderentur. Nonnulli tamen scelesti fenestras saxis et lateribus perfregerunt, exercitus acie instructa vi reclamantes sine discrimine mulcavit et comprehendit: quorum mille circiter in carcerem delati sunt, postero die fere omnibus libertas restituta est.

Usque ad diem XVIII mensis huius progredietur conventio mundana.

Scripsit Herimannus Novocomensis