De Russo tramine extra orbitas

Quinque et viginti saltem homines perierunt, nonaginta quinque sauciati sunt propter traminis ferriviarii celeris diversionem ab orbitis; investigatores Instituti Foederalis Securitatis (FSB) compererunt calamitatis causam pyrobolum fuisse, quo septem chiliogrammata trinitrotolueni (TNT) sceleste condita erant. De duodecim viatorum sorte nihil adhuc constat, sexaginta in nosocomium translati sunt; mille adiutores operam dant sine intermissione, septem helicoptera in locum caedis missa sunt. Tramen "Nevsky Express", quod fere quinque horis duas maximas Russiae urbes coniungit, Moscua Petroburgum versus Veneris die prima vigilia profectus erat sescentos octoginta duos viatores transportans. Ferriviarum Russarum nuntius dixit auctoritates suspicari ob ictum tromocraticum caedem factam esse; magnus crater apud orbitas divulsas in solo patens investigatores inducit ut idem opinentur. Imago descripta hominis, de quo indagatores suspicantur, omnibus astynomorum stationibus divulgata est.

Ante annos duos eiudem generis diruptio in eodem traiectu facta erat.

Scripsit Herimannus Novocomensis