Liberetur Aung San Suu Kyi!

Praesidens Civitatum Americae Unitarum Baracus Obama ex conventu Singapuriae habito ministrum primarium Burmae hortatur, ut domina Aung San Suu Kyi, mulier quae animose pro democratia in patria sua restauranda iam diu pugnavit, in libertatem restituatur.

Burmensibus domina Aung San Suu Kyi, quattuor et sexaginta annos nata, sola spes est liberetatis recuperandae. Quae, tametsi anno MCMXC Foedus Nationale Democratiae ducens partem maiorem consensuum a civibus acceperat, numquam patriam suam regere potuit, nam duces exercitus summa rerum vi potiti eam in vincula coniecerunt; anno subsequenti praemio Nobeliano exornata usque ad hunc diem fere sine intermissione aut custodia aut domi detenta est ideoque signum facta est pugnae populi sui ad libertatem et democratiam recipiendam. Cum aestate praeterita vir Americanus domum ubi captiva manet inire conatus sit, Aung San Suu Kyi iterum condemnata est: quam ob rem ei non licebit candidata fieri anno MMX comitiis in Burma habendis.

Nuntius USAe praesidentis sollemniter dixit: "Comitia in Burma anno proximo libere probe perspicue habenda sunt, ut communitas mundana ea ut fide digna agnoscat."

Scripsit Herimannus Novocomensis