Annus
2 0 0 9


IN PACHISTANIA CONDICIO BELLI CIVILIS GRAVATUR

IN PACHISTANIA CONDICIO BELLI CIVILIS GRAVATUR

Eruptio in medio foro

Centum et quinque homines, inter quos multae mulieres puerique, mortui sunt ob singulum ictum terroristicum patratum in urbe Pachistanica Peshawar. Saltem ducenti aliii sauciati sunt, postquam autocinetum substantiis displosivis fartum erupit in medio foro, pleno obsonantium. Ictus patratus est eodem die, cum in Pachistaniam officialiter advenit ministra rerum externarum USA, Hillary Clinton.

Similes ictus contra cives inermes perpetrati modo sunt in provincia Waziristania Australi a rebellatoribus radicialis gregis islamistici Taleban, qui bellum gerunt contra regimina Pachistaniae necnon vicinae Afganistaniae. Qui bellatores - ut putat Wojciech Jagielski, rerum Medii Orientis peritus diurnarius actorum Polonorum "Gazeta Wyborcza" - vi cogere cives conantur, ut una cum se rebellent contra ambo regimina necnon eorum socium principalem, Civitates Unitas Americae, quem 'diabolum' esse islamistae asseverant. Ut dicit Jagielski, multis in casibus id Talebanis impetrare contingit et numerus crescit civium, qui non plus credant se pacifice vivere posse sub dominatione Americanorum.

Simul volunt Talebani cogere regimen Pachistanicum, ut incursum in loca suorum in Waziristania Australi exercitus Pachistanicus desinat. In hac enim regione a nonnullis septimanis circiter triginta milia militum regiminis contra rebellatores pugnant, recaptantes multa oppida ab islamistis diu occupata.

Omnino in Pachistania mense Octobri plus quam quingentos cives vitam amisisse ob ictus terroristicos, qui numerus maior est victimis similium ictuum eodem tempore in vicina Afganistania patratorum.

Scripsit Stanislaus Varsoviensis iconoclastes.blog.onet.pl



Retro ad:

Novissima editio
Summum paginae