COMMISSIO EUROPAEA MONET:

Tertius quisque viro HIV laborans de morbo omnino nescit

Tertius quisque civis terrarum sociarum Unionis Europaeae (UE), qui viro humanae deficientiae immunitatis (HIV) laborat, de morbo sui omnino nescit - monent modo divulgata data Commissionis Europaeae. Gravior quoque putatur esse condicio in terris Europae Occidentalis, ut Russia, Moldavia et Ucraina, ubi ignari huius morbi in suo corpore praesentiae sint usque 70 centesimae hominum eo afflictorum. In Russia deficientia immunitatis laboret iam 1 centesima omnium civium, in Ucraina - 1,6 centesimae.

Quae res tristes maximo detrimento esse possunt ipsis viro HIV laborantibus, nam diagnosis sera periculum auget, ut pugna medicorum contra evolventem morbum HIV/AIDS multo fiat difficilior.

Inter annos autem 2001 et 2007 numerus civium terrarum UE atque trium supradictarum civitatum postsovieticarum, qui viro HIV laborare aestimantur, putatur auctum esse ex 1,5 usque 2,2 miliones - patet ex investigationibus Commissionis Europaeae. Quorum civium tertia pars sint incolae UE, alterae autem duae partes cives Ucrainae, Russiae et Moldaviae.

Data modo divulgata monstrant periculum contractionis morbi HIV/AIDS imminere imprimis tribus gregibus societatis Europae: viris homosexualibus (40% omnium, qui praeteritis sex annis viro HIV sunt afflicti), immigratoribus e terris maxime epidemia HIV/AIDS laborantibus necnon his, qui ope siphunculis substantiis narcoticis fruuntur (qui constituant 70% omnium viro HIV laborantium in Ucraina, Moldavia et Russia).

Scripsit Stanislaus Varsoviensis